ಸಂಸತ್‌ನಲ್ಲಿ ಗೃಹ ಸಚಿವ ಅಮಿತ್ ಶಾ ಅವರು ಅಂಬೇಡ್ಕರ್‌ ಅವರಿಗೆ ಅವಮಾನ ಮಾಡಿದ್ದಾರೆ ಎಂದು ಇಂಡಿಯಲ್ಲಿ ಪ್ರತಿಭಟನೆ

 ಇಂಡಿ.  ಸಂಸತ್‌ನಲ್ಲಿ ಗೃಹ ಸಚಿವ ಅಮಿತ್ ಶಾ ಅವರು ಅಂಬೇಡ್ಕರ್‌ ಅವರಿಗೆ ಅವಮಾನ ಮಾಡಿದ್ದಾರೆ ಎಂದು ಆರೋಪಿಸಿ ಪಗ್ರತಿಪರ ಚಿಂತಕರು ಹಾಗೂ ಅಂಬೇಡ್ಕರ ಅನುಯಾಯಿ ಬಳೆಗ ಹಾಗೂ ವಿವಿಧ ಸಂಘಟನೆಗಳ ವತಿಯಿಂದ ಶುಕ್ರವಾರ ಇಲ್ಲಿನ ಬಸವೇಶ್ವರ ವೃತ್ತದಲ್ಲಿ ಪ್ರತಿಭಟನೆ ನಡೆಸಲಾಯಿತು.

ಅಮಿತ್ ಶಾ ವಿರುದ್ಧ ಧಿಕ್ಕಾರ ಕೂಗಿದ ಪ್ರತಿಭಟನಕಾರರು, ಶಾ ಪುತಳಿಗೆ  ಚಪ್ಪಲಿ ಹಾರ್ ಹಾಕಿ ಹಾಗೂ ಕೊನೆಯಲ್ಲಿ ಭಾವಚಿತ್ರಗಳನ್ನು ಸುಟ್ಟು ಹಾಕಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ವಿವಿಧ ಮುಖಂಡರು  ಬಿಜೆಪಿ ಮನುವಾದಿ ಪಕ್ಷ, ಆ ಪಕ್ಷದ ನಿಜವಾದ ಬಣ್ಣ ಈಗ ಮತ್ತೊಮ್ಮೆ ಬಯಲಾಗಿದೆ. ಅಮಿತ್ ಶಾ ಅವರನ್ನು ಸಂಪುಟದಿಂದ ಕಿತ್ತೊಗೆಯಬೇಕು, ಮುಂಬರುವ ಚುನಾವಣೆ ವೇಳೆ ಅಂಬೇಡ್ಕರ್‌ ಪರ ನಿಲುವ ಇರುವ ಎಲ್ಲರೂ ಬಿಜೆಪಿಯಿಂದ ಹೊರಬರಬೇಕು, ಚುನಾವಣೆಯಲ್ಲಿ ಪಕ್ಷಕ್ಕೆ ತಕ್ಕ ಪಾಠ ಕಲಿಸಬೇಕು’ ಎಂದು ಮಾತನಾಡಿ ಹಲವು ನಾಯಕರು ಒತ್ತಾಯಿಸಿದರು.

ತಲಿದ ಮುಖಂಡ ಪ್ರಶಾಂತ ಕಾಳೆ ಮಾತನಾಡಿ  ಇಂದು ಸಂವಿಧಾನದ ಹೆಸರಿನ ಮೇಲೆ ಅಧಿಕಾರಕ್ಕೆ ಬಂದಂತಹ ಬಿಜೆಪಿ ನಾಯಕರು ಆ ಸಂವಿಧಾನಕ್ಕೆ ಮತ್ತು ಅದರ ನಿರ್ಮಾತೃರಾದಂತಹ ಡಾ.ಅಂಬೇಡ್ಕರ್ ರಿಗೆ ಅವಮಾನ ಮಾಡುವಂತಹ ಮಾತನಾಡಿದ್ದು ಖಂಡನೀಯ.

ಕೇವಲ ಭಾರತವಷ್ಟೇ ಅಲ್ಲದೆ ಪರದೇಶಗಳಲ್ಲಿಯೂ ಕೂಡ ನಮ್ಮ ಸಂವಿಧಾನವನ್ನು ಮತ್ತು ಅದರ ಶಿಲ್ಪಿಗಳಾದ ಡಾ.ಅಂಬೇಡ್ಕರ್ ರವರನ್ನು ಗೌರವದಿಂದ ಕಂಡು ಪೂಜ್ಯನೀಯ ಭಾವನೆಯನ್ನು ವ್ಯಕ್ತಪಡಿಸುತ್ತಾರೆ. ಆದರೇ, ಅವರ ಜನ್ಮ ಭೂಮಿಯಾದ ಭಾರತದಲ್ಲಿ ಕೆಲವೊಂದು ಅವಿವೇಕಿಗಳು ಈ ತರಹದ ಮಾತನಾಡುತ್ತಾರೆ ಇದು ನಾಚಿಕೆಗೇಡಿನ ಸಂಗತಿ ಎಂದರು.

ಇಲಿಯಾಸ ಬೋರಾಮಣಿ ಮಾತನಾಡಿ ದೇಶದಲ್ಲಿ ಹಲವಾರು ಜ್ವಲಂತ ಸಮಸ್ಯೆಗಳಿವೆ ಅವೆಲ್ಲವುಗಳನ್ನು ಪರಿಹರಿಸುವುದನ್ನು ಬಿಟ್ಟು ಅಭಿವೃದ್ಧಿ ಕೆಲಸಗಳನ್ನು ಮಾಡುವುದನ್ನು ಬಿಟ್ಟು ಇಂತಹ ಕುತಂತ್ರಗಳನ್ನು ಮಾಡುವುದರಲ್ಲಿ ನಿರತರಾಗಿದ್ದಾರೆ. ಇವರೆಲ್ಲರೂ ಮನುವಾದ ತುಂಬಿಕೊಂಡಂತಹ ಮನೋರೋಗಿಗಳು ಎಂದರು.

ದಲಿತ ನಾಯಕ ಪ್ರಶಾಂತ ಕಾಳೆ, ಇಲಿಯಾಸ ಬೋರಾಮಣಿ, ಜೆಟ್ಟೆಪ್ಪ ರವಳಿ, ಪುರಸಭೆ ಅಧ್ಯಕ್ಷ ಲಿಂಬಾಜಿ ರಾಠೋಡ, ಜಾವೀದ ಮೋಮಿನ, ಅಬ್ದುಲ್ ರಶೀದ ಅರಬ, ಸದಾಶಿವ ಪ್ಯಾಟಿ,  ಅಯುಬ ಬಾಗವಾನ, ಉಮೇಶ ದೇಗಿನಾಳ, ರಯಿಸ್ ಆಸ್ಟೇಕರ, ಹುಚ್ಚಪ್ಪ ತಳವಾರ, ಉಸ್ಮಾನ ಶೇಖ್, ಹುಚ್ಚಪ್ಪ ಅಂಜುಟಗಿ, ಭೀಮಣ್ಣ ಕವಲಗಿ, ಅವೀನಾಶ ಬಗಲಿ, ಸೇರಿದಂತೆ ಅನೇಕ ದಲಿತ ಮುಖಂಡರು ಇದ್ದರು.