ಶ್ರೀ ಎಂ ಎಂ ವಾಲಿಕಾರ ಶಿಕ್ಷಕರಿಗೆ ಗೌರವದ ಸನ್ಮಾನ

 ಶ್ರೀ ಎಂ ಎಂ ವಾಲಿಕಾರ ಶಿಕ್ಷಕರಿಗೆ ಗೌರವದ ಸನ್ಮಾನ

ಶ್ರೀ ಎಂ ಎಂ ವಾಲಿಕಾರ ಶಿಕ್ಷಕರು ಸರ್ಕಾರಿ ಹೆಣ್ಣು ಮಕ್ಕಳ ಶಾಸಕರ ಮಾದರಿ ಪ್ರಾಥಮಿಕ ಶಾಲೆ ತಾಂಬಾ ತಾ.ಇಂಡಿ ಹಾಗೂ ಕರ್ನಾಟಕ ರಾಜ್ಯ ಪ್ರಾಥಮಿಕ ಶಾಲಾ ಶಿಕ್ಷಕರ ಸಂಘ ವಿಜಯಪುರದ ಜಿಲ್ಲಾ ಉಪಾಧ್ಯಕ್ಷರು ಇವರಿಗೆ ಡಾಕ್ಟರೇಟ್ ಪದವಿಯನ್ನು ಪಡೆದಿರುವುದಕ್ಕಾಗಿ, ತಾಂಬಾ ಹಾಗೂ ಸುತ್ತಮುತ್ತಲಿನ ಗ್ರಾಮದ ಶಾಲೆಯ ಗುರುಬಳಗದ ವತಿಯಿಂದ ಸನ್ಮಾನಿಸಿ, ಹೃದಯಸ್ಪರ್ಶಿ ಅಭಿನಂದನೆಗಳನ್ನು ಸಲ್ಲಿಸಲಾಯಿತು. 

ಶ್ರೀ ಎಂ ಎಂ ವಾಲಿಕಾರ ಗುರುಗಳು ವೃತ್ತಿಯಿಂದ ಶಿಕ್ಷಕರಾಗಿದ್ದು ಪ್ರವೃತ್ತಿಯಿಂದ ರಂಗಭೂಮಿ ಕಲಾವಿದರಾಗಿ ಅದರಲ್ಲೂ ವಿಶೇಷವಾಗಿ ಖಳನಾಯಕನ ಪಾತ್ರಕ್ಕೆ ಹೇಳಿ ಮಾಡಿಸಿದ ವ್ಯಕ್ತಿತ್ವ ಇವರಲ್ಲಿದೆ."ಬಡವ ಬದುಕಲೇಬೇಕು"ಎಂಬ ಸುಂದರ ಸಾಮಾಜಿಕ ನಾಟಕದಲ್ಲಿ ಖಳನಾಯಕನ ಕ್ರೌರ್ಯದ ಪಾತ್ರಕ್ಕೆ ಜೀವತುಂಬಿ, ಅಭಿನಯಿಸುತ್ತಿರುವಾಗಲೇ ಅದೆಷ್ಟೋ ಜನ ರಂಗ ಸಚಿಕೆಯಲ್ಲಿ ಬಂದು ಬೈದವರುಂಟು, ಅದೆಷ್ಟೋ ಜನ ಕಲ್ಲು ಹೊಡೆದವರುಂಟು, ಇಷ್ಟೊಂದು ಯಶಸ್ವಿ ಪಾತ್ರವನ್ನು ಅಭಿನಯಿಸಲು ಎತ್ತಿದ ಕೈ ನಮ್ಮ ಶ್ರೀ ಎಂ ಎಂ ವಾಲಿಕಾರ ಗುರುಗಳು.

            ಇದಷ್ಟೇ ಅಲ್ಲದೆ ಹಲವಾರು ನಾಟಕಗಳನ್ನು ರಚಿಸಿ ತಮ್ಮ ಶಿಷ್ಯರಿಂದಲೇ ಆ ನಾಟಕಗಳನ್ನು ಅಭಿನಯಿಸಿ ಸಮಾಜಕ್ಕೆ ಉತ್ತಮ ಸಂದೇಶವನ್ನು ಸಾರುವ,ನೈತಿಕ ಮೌಲ್ಯಗಳನ್ನು ನೀಡುವ ನಾಟಕ,ರೂಪಕಗಳನ್ನು ರಚಿಸಿ, ತನ್ನೊಳಗೊಬ್ಬ ಎಲೆ ಮರೆಯಕಾಯಿಯಂತೆ ಜೀವಿಸುವ ಕವಿಯೊಬ್ಬ ಇದ್ದಾನೆ ಎನ್ನುವುದಂತೂ ಪಕ್ಕಾ.

               ಶ್ರೀ ಎಂ ಎಂ ವಾಲಿಕಾರ ಗುರುಗಳು ಗ್ರಾಮದಲ್ಲಿ ನಡೆಯುವ ಜಾತ್ರೆ , ಉರುಸ್ಗಳಲ್ಲಿ ಅಭಿನಯಿಸುವ ಎಲ್ಲ ನಾಟಕಗಳಿಗೆ ನಿರ್ದೇಶಕರಾಗಿ,ಹೆಗಲಿಗೆ ಹೆಗಲು ಕೊಟ್ಟು ಯಶಸ್ವಿಗೊಳಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ.ಇನ್ನೂ ತಮ್ಮ ವೃತ್ತಿ ಜೀವನದಲ್ಲಿ ಸಮೂಹ ಸಂಪನ್ಮೂಲ ವ್ಯಕ್ತಿಯಾಗಿ,ತಾಲೂಕ ಶಿಕ್ಷಕರ ಸಂಘದ ಎರಡು ಅವಧಿಗೆ ಅಧ್ಯಕ್ಷರಾಗಿ, ತಮ್ಮ ಅಧ್ಯಕ್ಷತೆಯ ಅವಧಿಯಲ್ಲಿ ಗುರುಭವನ ಉದ್ಘಾಟನೆಗೊಂಡದ್ದು ಇವರ ಕಾರ್ಯವೈಖರಿಗೆ ಹಿಡಿದ ಕನ್ನಡಿಯಾಗಿದೆ. ಈಗ ಜಿಲ್ಲಾ ಸಂಘದ ಉಪಾಧ್ಯಕ್ಷರಾಗಿ ಶಿಕ್ಷಕರ ಸರ್ವ ಸಮಸ್ಯೆಗಳಿಗೂ, ಶಿಕ್ಷಕರ ಪರವಾಗಿ ನಿಂತು ಹೋರಾಟ ಮಾಡುವವರಲ್ಲಿ ಇವರು ಮೊದಲಿಗರಾಗಿದ್ದಾರೆ, ನಿರಾಡಂಬರದ ಅತ್ಯಂತ ಸರಳ ಜೀವಿ, ಸಜ್ಜನ ಸಂಪನ್ನ ಶಿಕ್ಷಕರಿವರು. ಸರ್ವ ಧರ್ಮದವರೊಂದಿಗೆ ಅತ್ಯಂತ ಪ್ರೀತಿ ವಾತ್ಸಲ್ಯದಿಂದ, ಸ್ನೇಹಜೀವಿಯಾಗಿ, ಹಿರಿದು ಕಿರಿದೆನ್ನದೆ, ಸಮನ್ವಯತೆಯಿಂದ, ಸಹಬಾಳ್ವೆಯಿಂದ, ಸರ್ವರೊಂದಿಗೆ ಬೆರೆತು, ಎಲ್ಲರೊಳಗೊಂದಾಗಿರುವವರು ನಮ್ಮ ಹೆಮ್ಮೆಯ ಶ್ರೀ ಎಂ ಎಂ ವಾಲಿಕಾರ ಗುರುಗಳು.

              ಇವರ ಸಾಹಿತ್ತಿಕ ಸೇವೆ, ಸಾಮಾಜಿಕ ಸೇವೆ, ಶೈಕ್ಷಣಿಕ ಸೇವೆ, ಶಿಕ್ಷಕರ ಸೇವೆ ಇದೆಲ್ಲದರ ಒಟ್ಟುಗೂಡಿಸಿ,ಉತ್ತಮ ವ್ಯಕ್ತಿತ್ವದ ಶಿಕ್ಷಕರಿಗೆ ಡಾಕ್ಟರೇಟ್ ಪದವಿ ದೊರೆತಿರುವುದು ಸ್ವಾಗತರ್ಹವಾಗಿದೆ. ಇವರಿಗೆ  ಡಾಕ್ಟರೇಟ್ ಪದವಿ ನೀಡಿ ಗೌರವಿಸಿದ ವಿಶ್ವವಿದ್ಯಾನಿಲಯಕ್ಕೂ ಗೌರವದ ಅಭಿನಂದನೆಗಳು. ಹಾಗೂ ಡಾ. ಶ್ರೀ ಎಂ ಎಂ ವಾಲಿಕಾರ ಗುರುಗಳಿಗೆ ತಾಂಬಾ ಹಾಗೂ ಸುತ್ತಮುತ್ತಲಿನ ಗ್ರಾಮಗಳ ಗುರುಬಳಗ ಅತ್ಯಂತ ಗೌರವ ಪೂರ್ವಕವಾಗಿ ಸನ್ಮಾನಿಸಿ, ಗೌರವಿಸಿ ಅಭಿನಂದನೆಗಳನ್ನು ಸಲ್ಲಿಸುವುದರ ಜೊತೆಗೆ ಒಂದು ಧನ್ಯತಾ ನುಡಿ ನಮ್ಮ ಹೆಮ್ಮೆಯ ಡಾ. ಶ್ರೀ ಎಂ ಎಂ ವಾಲಿಕಾರ ಗುರುಗಳಿಗಾಗಿ. ಗುರುಗಳ ಬಾವಿ ಭವಿಷ್ಯವು ಇನ್ನೂ ಉಜ್ವಲವಾಗಲಿ, ತಮ್ಮ ಸಾಹಿತ್ಯಿಕ,ಸಾಂಸ್ಕೃತಿಕ ಸೇವೆ ಹೆಚ್ಚು ಹೆಚ್ಚು ಮುಂದುವರೆಯಲಿ. ಜನಮಾನಸದಲ್ಲಿರುವ ಓರೆ- ಕೋರೆಗಳನ್ನು ತಿದ್ದುವಂತಹ ನಾಟಕಗಳು ಹೊರಹೊಮ್ಮಲಿ, ಆ ದೇವರು ಗುರುಗಳಿಗೆ ಸದಾ ಒಳ್ಳೆಯದನ್ನೇ ಮಾಡಲಿ ಎಂದು ಆಶಿಸುತ್ತಾ ಸನ್ಮಾನಿಸಿದ ಗುರು ಬಳಗದ ಆಶಯದ ನುಡಿ.